3 استراتيجيات تساعدك على اتخاذ قرارات استثمارية في البورصة بدون تأثير مشاعرك

اتكلمنا في الاسبوع اللي فات عن 5 استراتيجيات للتعامل مع القلق. وقلنا اللياقة النفسية لا تقل أهمية عن اللياقة البدنية. وادينالكم خمس طرق للتعامل مع القلق وطريقتي المفضلة هي التقبل والتعايش مع المجهول بدون التفكير في اسوأ سيناريو. لأني مهما عملت مش هكون مستعد. فلازم اعيش لحظة بلحظة.

اما بقى عن موضوعنا الاسبوع ده هنتكلم برضه عن استراتيجيات جديدة بس مش للتعامل مع القلق. للتعامل مع البورصة. وشوفنا البورصة رفعت ناس كتير بس برضه ناس كتير فلسوا بسببها. وانا عامل البلوج ده بناء على مقال كنت قرأته على موقع ياهو. والمقال اتكلم عن 3 استراتيجيات مهمين جدا للاستثمار في البورصة. فلو بتستثمر في البورصة فانت اكيد عارف الكلام ده وهتستفاد من التذكرة. ولو مش بتستثمر وبتفكر يبقى خد فكرة واشتري بكرة. ولو عادي مش فارق معاك البورصة بردو اقرا البلوج وزود من ثقافتك المالية.

1. اعرف ليه انت اشتريت السهم

بيقول المقال ان القرارات المبنية على العاطفة بتؤدي الي انك تبيع الاسهم في الوقت الغلط. يعني لو اشتريت اسهم بتاعة شركة واعدة وبعتها بدري هتفوتك مكاسب كبيرة. وبعدين بيقول اكبر غلطة لما تبيع سهم كويس بعدين قيمته ترتفع اضعاف مضاعفة.

طيب امتى تبيع؟ بيقول الخبراء انك لازم تعرف انت ليه اشتريت السهم من الاول. يعني لازم ترجع للاسباب الاساسية اللي خلتك تستثمر في الشركة وتفضل متابع اخبارها. يعني مثلا لو كنت اشتريت سهم شركة لسه صغيرة واحتفظت به لغاية ما كبرت وبقت مشهورة كان زمانك مليونير.

وانا بحب شركات التكنولوجيا وهديك مثال لما شركة سناب شات بدءت تداول اسهمها في 2019 كان السهم بكام؟ كان ب9 دولار بعديها بتلات سنين بقى ب75 دولار. فأنت لازم تعرف قبل حتى ما تشتري السهم: انا هحتفظ بالسهم ده سنتين تلاتة او خمس او عشر سنين ومش هبيع مهما كان.

2. تبنى منظور المدى الطويل

علشان تقدر تتعامل مع مشاعرك وتقلبات البورصة اليومية، لازم دايما تبص لبعيد. وارن بافت اللي هو اشهر مستثمر في عصرنا مرة قال "البورصة هدفها تحويل الفلوس من الشخص المستعجل الي الشخص الصبور.” وبيشجع المستثمرين انهم يشتروا اسهم قوية من شركات قوية في السوق ليها مميزات تنافسية قوية بغض النظر عن تقلبات السوق على المدى القصير.

حتى وارن بافت نفسه اعترف انه مستحيل تتوقع تحركات السوق وهو لقبه عراف اوماها.

فأنت متفكرش كتير في اللي حصل النهاردة ولا اللي هيحصل بكرة. متفكرش بالايام والاسابيع فكر الشهور والسنين. وقاوم اغراء انك تبيع قبل الاوان ولا حتى بعد الاوان. فمحدش عارف السوق هيكون عامل ازاي كمان ساعة. لأنه بيتأثر بكل حاجة بتحصل وطول الوقت في حاجات بتحصل. وبيقول وارن بافت انا عمري ما اتخذت قرار بيع او شراء بناء على توقعات السوق.

يعني هو اصلا ميعرفش السوق هيبقى عامل ازاي كمان شوية.

طيب تعمل ايه؟ بيقولك ادرس الشركة دي وافهمها كويس جدا. حلل ادائها واعرف كل حاجة ممكن تتعرف عنها قبل ما تستثمر فيها. شوف الشركة دي عندها مقومات النجاح، سمعتها في السوق قوية؟ بتقدم خدمة مميزة ومنتج صعب التقليد؟ مؤسس الشركة عامل ازاي؟ ومجلس الادارة؟ قارن الشركة بناء على اساسيات البيزنس السليمة علشان تعرف الشركة دي قوية ومستمرة وتستحق تشتري الاسهم ولا ايه.

فعلشان تعمل ثروة من البورصة لازم تحط مشاعرك في تلاجة. وتستغل خوف وطمع باقي المضاربين.

3. انشأ صندوق المخاطر قبل البدء في الاستثمار

طبعا كلنا بنحاول نكون متماسكين لما السوق يتحرك تحركات مفاجأة. وده شيء طبيعي لأننا بنحتاج فلوس في حياتنا اليومية.

ومن هذا المنطلق، قبل ما تبدء في الاستثمار في البورصة لازم يكون عندك صندوق طواريء. يعني فلوس شايلها على جنب احتياطي لو عربيتك احتاجت صيانة او جالك مرض مفاجيء او خسرت وظيفتك لاي سبب.

الهدف الرئيسي من الصندوق ده هو الامان المالي. وكمان هتخفف من المشاعر السلبية من القرارات الاستثمارية. فلما تكون عارف انك مغطي احتياجاتك المالية كويس، هتقدر تقاوم القرارات المتسرعة بسهولة اكبر زي انك تبيع الاسهم بخسارة علشان محتاج فلوس ضروري.

طيب ايه حجم الصندوق ده. بيقترح الخبراء ان صندوق الطواريء يقدر يغطي من 3 الي 6 شهور من احتياجات المعيشة. والقيمة دي ممكن تتغير بناء على ظروفك الشخصية زي الاستقرار الوظيفي والالتزامات المالية الاخرى.

ازاي تبدء الاستثمار في البورصة؟

لو عايز تبدء استثمار في البورصة مينفعش تروح البورصة كده تحط فلوسك وتستثمر. لأ. في سمسار بيتداول نيابة عنك. يعني زي منصة بتدخل عليها وتحط فلوس في محفظة بعدين تبدء تبيع وتشتري، والمنصة دي بتكون وسيط بينك وبين البورصة.

ولو انت بتبدء من الصفر مش لازم انك تبدء من الدار للنار. وانا انصحك انك تجرب الاول تشتري في صندوق استثماري. الصندوق ده بيبقى عبارة عن مجموعة اسهم من افضل الشركات المضمونة وبتحقق ارباح باستمرار.

ولما تبدء تجمع ارباح وتفهم الدنيا ماشية ازاي بعديها ابدء دور في الشركات والاسهم. جرب تشتري من شركة او اتنين وتحافظ على الاسهم وتبيعها لما قيمتها ترتفع. وهكذا. مرة في مرة هتلاقي نفسك بتحقق ارباح معقولة ولما خبرتك بتزيد بتعرف تختار الاسهم الصح.

ولما تندمج مع المستثمرين التانيين هتستفيد من خبراتهم اكتر وهيدلوك تعمل ايه.

وانا مش بنصح بأي منصة معينة. المنصات كتير وتقدر تدخل وتدور على أشهر منصات التداول والتطبيقات وتختار المنصة المناسبة ليك. البلوج ده ترفيهي تعليمي وانا مش خبير في البورصة وغير مسؤول عن اي خسائر مادية.

اما بالنسبة لرأس المال فأنت هتحتاج رأس مال محترم تبدء به ويا ريت تكون فلوس انت مستغني عنها وتقدر تعيش من غيرها علشان احتمال تخسر جزء كبير منها في رحلتك التعليمية. فاعمل حسابك ان رأس المال ده هتتعلم فيه الاول قبل ما تفهم هتتبع انهي استراتيجية. فمش لازم يكون كتير قوي ولا قليل قوي، يعني حاجة بين البينين مش هتضلعك لو خسرتها مرة واحدة.

خلاصة الكلام

وفي النهاية، البورصة طريقة للاستثمار زي الدهب والعقارات ومش بتجيب نتائج مع كل الناس. كل شخص له طريقة استثمار بيرتاح فيها وبتجيب معاه نتيجة فمش كل طرق تحقيق الثروة مناسبة لكل الناس بالتساوي. بس لو حبيت البورصة وذاكرت كويس مفيش مانع انك تحقق ارباح وتبقى مليونير ولا حاجة.

والبورصة مش هتحققلك ثروة كبيرة في وقت قصير. ولو داخل على اساس انك تجيب ضربة حظ يبقى بلاش تدخل. لازم زي ما قلنا انك تفكر على المدى الطويل. حتى لو حققت مكاسب سريعة في الاول فده مش معناه انك هتنجح طول الوقت. وطبعا البورصة دي محتاجة اعصاب من فولاذ علشان تنجح فيها مش اي حد عنده القدرات دي. وخلي بالك انت ممكن تشتري السهم النهاردة بخمس جنيه بعديها بشهرين يبقى بـ٥٠ جنيه فتطمع وتبيعه بس بعد ما تبيع بشهر يبقى بـ١٠٠ جنيه هتحس بأيه ساعتها؟

او تشتريه ب١٠٠ جنيه بعديها بشهر ينزل يبقى ٧٥ جنيه وانت تخاف ينزل اكتر وتبيع بخساره بس بعد شهرين يبقى ٢٥٠ جنيه.

هتحس بأيه ساعتها؟

فهو مستحيل تتوقع تحركات السوق بدقة. وطالما اشتريت لازم تعرف مستعد تبيع امتى وبكام وتقدر تتحمل خسارة قد ايه وتتمسك بالكلام ده مهما السوق طلع او نزل. وانا هنا مش بتكلم في خمسين وستين جنيه، دي مئات الالوف وملايين مملينة.

وفي النهاية شكرا للمتابعة واللي عنده تعليق مفيد يا ريت ميبخلش به علينا. والي ان نلتقي مرة اخرى لكم مني اطيب وارق الامنيات بالنجاح المالي الآن وفي المستقبل. سلام. اه ومتنساش مشاركة المقال لتعم الفائدة ولغاية ما نتقابل تاني خلي بالك من نفسك واشرب مياه كتير. سلام.