ترويض طاقة الغضب الشيطانية النارية واستغلالها بطريقة صحيحة

الغضب يا اصدقائي من اقوى المشاعر واخطرها كمان. طاقة الغضب ممكن تكون مدمرة وممكن نستخدمها علشان نحقق اهدافنا. انا بقارن طاقة الغضب بالنار، يعني ممكن نستخدمها علشان ندفى بيها ونطبخ اكلنا وممكن تولع فينا وكل حاجة بنحبها. وكلنا بنشعر بالغضب وهو شعور طبيعي جدا حتى الحيوانات بتشعر به لما تحس بخطر وتغضب وتدافع عن نفسها.

الطريقة الصحية للتعامل مع مشاعر الغضب

بس للاسف، كتير مننا مش فاهمين الغضب ومش عارفين نتعامل معاه ازاي علشان نتحكم فيه بدل ما يتحكم فينا. وهو ده موضوع بلوجنا وتركيزنا فخليك معايا للاخر واوعدك هتخرج من البلوج ده وانت عندك طاقة جديدة ووجهة نظر جديدة تماما…

مع الغضب الوقاية خير من العلاج. لأن ساعة الغضب ممكن تاخد قرار او تتصرف تصرف متقدرش تعالجه او تخرج منك كلمة متقدرش ترجعها. فالغضب له اثار مدمرة. ومعظم اسباب الغضب بتكون خارجية. بس انت برضه بتساهم بشكل او بآخر في صب البنزين على النار بأنك تفكر افكار سلبية.

الغضب شعور له علامات واضحة زي التكشير واندفاع الدم في الوجه وسرعة نبضات القلب والارتعاش. كل دي علامات بتشعر بيها وبيبقى صعب تقاومها لان جسمك بيكون في حالة هجوم وعدائية وفي الحالة دي بيكون صعب انك تهدى وبالتالي بتكون مندفع. وزي ما قلت ممكن تعمل او تقول حاجة تندم عليها.

التعامل مع الغضب مش سهل ابدا، بس ممكن. علشان الغضب شعور قوي من اقوى المشاعر اللي بنمر بيها. ولأما نروضها لأما هتدمرنا. من افضل طرق التعامل مع الغضب اللي قرأت عنها هو انك تذكر نفسك بالصورة الكبيرة. الشعور بالغضب بيخليك تفكر في اللحظة دي دلوقتي حالا كأنك مش شايف اي حاجة تانية. وده لأن كل تركيزك بيكون على الموقف نفسه وردة فعلك. تفكيرك كله بيكون مركز على الموقف ده وكان مفيش حاجة تانية.

ساعتها بيبقى صعب تفكر في عواقب افعالك. نفس الفكرة لما تكون ماشي في الشارع بتفكر هتاكل ايه لما تروح وفجأة يطلع عليك كلب مسعور. ساعتها بتنسى تماما انت كنت بتفكر في ايه وكل تفكيرك بيكون مركز على الكلب ده وعمال تفكر تعمل ايه معاه.

سيبك من المثال ده علشان عارف في ناس مش هتفهمه. مثلا فكر لما كنت عايز تترقى والمدير رفض. ساعتها شوف غضبت قد ايه بس مفكرتش تطور مهاراتك وتضيف حاجة جديدة علشان تترقى.

اسباب الغضب والاسلوب الامثل للتعامل معه

او لما سواق مبتدء مثلا كسر عليك في الشارع وكنت هتعمل حادثة، ساعتها شتمته واتخانقت معاه. ونسيت ان انت نفسك كنت هتعمل حادثة لما كنت بتتعلم السواقة.

او لما صاحبك طلع سر من اسرارك مع صحابك التانيين واتريق على شكلك. وزعلت منه جدا واتخانقت معاه وهو اصلا كان بيهزر معاك والموضوع مش هيأذيك وطبعا نسيت كل حركات الجدعنة اللي عملها معاك قبل كده.

طبعا في حاجات فوق حمل اي شخص ممكن تزود غضبك. وكل دي امثلة عن حاجات خارجة عن ارادتك بتثير مشاعر الغضب فيك. بس ساعتها برضه لازم تفتكر الحاجات الحلوة مش تركز بس على الحاجة الوحشة اللي قدامك. لازم تفكر في عواقب افعالك ونتيجة اي رد فعل هتكون ايه. وانا قلت قبل كده الشخص اللي يقدر يستفزك ويخرجك عن شعورك يقدر يسيطر عليك خبي مشاعرك ومتظهرهاش على وشك مهما كان جواك بركان غضب او حب مجنون.

مشاعر الانسان لا تخضع لقوانين العقل والمنطق وبيبقى صعب السيطرة عليها. والغضب من اصعب المشاعر اللي ممكن نسيطر عليها. بس احنا نقدر نسيطر عليها فعلا. سهل جدا انك تعلي صوتك وتشتم وتتخانق بس دي اخلاق العبيد. الصعب فعلا هو انك تسيطر على انفعالاتك ومشاعرك وتكون الشخص العاقل.

ماذا تفعل عندما ينفجر بركان الغضب بداخلك

ومن هنا هي دي قوتك وحاجة تخليك تكسب احترام اللي حواليك. يعني انت تحت ضغط الظروف الصعبة بتحافظ على التفكير السليم. ومن هنا بتقدر تخرج من المواقف بأقل خسائر ممكن من غير ما تحرج نفسك او تكسر قواعد اللياقة والادب.

وفي التعبير القرآني وَالْكَاظِمِينَ الْغَيْظَ وَالْعَافِينَ عَنِ النَّاسِ. يعني تكتم غيظك جواك وتعفي عن الناس. ودي قمة القوة والكرامة. لأنك تجاوزت الاساءة دي وكمان سامحت الشخص اللي ظلمك. لأنك لو كتمت الغيظ جواك وفكرت في الانتقام هتفضل تعيش في الاساءة دي. وحتى لو انتقمت مش هترتاح ابدا والشخص التاني هينتقم تاني وتفضل دايرة الانتقام مستمرة.

لكن لو قدرت تتجاوز الاساءة دي او ايا كان سبب غضبك وكمان عفيت عن الشخص، فده معناه انك اقوى منه وعفيت عنه مع قدرتك على رد الصاع صاعين. وفي الحديث النبوي يقول رسول الله: "مَنْ كَظَمَ غَيْظًا، وَهُوَ يَقْدِرُ عَلَى إِنْفَاذِهِ مِلْأَهُ اللَّهُ أَمْنًا وَإِيمَانًا". فأنت من الناحية الايمانية يجب عليك انك تكبت غضبك.

وبكده تستخدم الغضب في التقرب من الله.

لا تغضب

بجانب النصيحة النبوية اللي بتلخص وبتسهل كل حاجة في كلمتين: لا تغضب. فأنت في وقت الغضب افتكر الحلو. تنفس نفس عميق تخيل نفسك فوق كوكب القمر مثلا او في جنينة كلها ورد وزرع جميلة. تخيل نفسك على شاطيء البحر والسما صافية. شوف انهي صورة بتهدي اعصابك وتخيلها وعيش جواها. في مجرد ثواني هتلاقي احساس الغضب بيتلاشى وبيحل محله احساس بالراحة والهدوء. الغضب ده آفة نفسية بتبدء من واحد عنده عصبية زيادة لغاية واحد المفروض يتعزل في زنزانة تحت الارض وعليه حراسة مشددة!

في طرق نفسية للتعامل مع الغضب، زي انك تفهم انت غضبان ليه من الاساس؟ اصل كل ما تعرف سبب الغضب كل ما يكون اسهل التعامل معاه. ايه الفكرة المسيطرة على تفكيرك ومخلياك غضبان. مثال مثلا انا واحد صاحبي استلف عربيتي وعمل حادثة ودلوقتي انا لازم اصلحها على حسابي. هل صاحبي كان يقصد يخبط العربية؟ اكيد هقول ده مهمل وانا مش هسلفه عربيتي. بس ممكن اقول انه مكنش قصده وان دي حادثة بسيطة صاحبي اتسبب فيها بسبب اهماله. بس هل صاحبي يستحق الغضب ده كله. ماهو اكيد دي حاجة تضايق اي حد بس هو صاحبي ملاك نزل من السما وبعدين مين قال ان عربيتي ممنوعة من الحوادث اي عربية معرضة لكده. فانا اخليني ماشي مع خط التفكير ده. هتوصل انك تعطي المشكلة حجمها الطبيعي بلا زيادة ولا نقصان.

صحيح مش هيزول الم الغضب بس على الاقل مش هتصرف تصرفات او اقول كلام اندم عليه. هحس بالغضب ايوة وهتألم منه ايوة بس هيفضل ايه هيفضل جوة تفكيري مش هياخد حيز مادي على شكل افعال واقوال.

الغضب اللي جواك مش بيأذيك لوحدك، بيأذي الناس حواليك كمان. ولو في حد غضبان حواليك، هتعاني من غضبه برضك. والغضب المكتوم هيدمرك من جواك اكتر من اي مشاعر سلبية أخرى. الكلام عن الغضب والتعامل معاه اتكلم عنه علماء نفس واتألف عليه كتب قيمة. واتمنى تكون البلوجات القصيرة بتاعتي بتقدم ملخص سريع لاهم افكارهم. والي اللقاء في ظروف تكون احسن من كده.